‘நம்பர்–1’ நோக்கி இந்தியா | ஜனவரி 16, 2023

ஐதராபாத்: நியூசிலாந்துக்கு எதிரான தொடரை முழுமையாக வெல்லும் பட்சத்தில் இந்திய அணி, ஒருநாள் அரங்கில் ‘நம்பர்–1’ இடம் பிடிக்கலாம். 

இந்தியா வந்துள்ள நியூசிலாந்து அணி தலா மூன்று போட்டிகள் கொண்ட ஒருநாள், ‘டி–20’ தொடரில் பங்கேற்க உள்ளது. முதலில் ஒருநாள் தொடர் நாளை ஐதராபாத்தில் துவங்கவுள்ளது. அடுத்த இரு போட்டிகள் ராய்ப்பூர் (ஜன. 21), இந்துாரில் (ஜன. 24) நடக்கும். 

இதற்கான ரோகித் சர்மா தலைமையிலான இந்திய அணி வீரர்கள், நேற்று ஐதராபாத் சென்று சேர்ந்தனர். இன்று இவர்கள் பயிற்சியை மேற்கொள்ள காத்திருக்கின்றனர். ரோகித், கோஹ்லி உள்ளிட்டோர் ஐதராபாத் விமான நிலையம் வந்த வீடியோவை ரசிகர்கள் பகிர்ந்து வருகின்றனர்.

‘நம்பர்–1’ வாய்ப்பு

ஒருநாள் தரவரிசையில் தற்போது நியூசிலாந்து 115 புள்ளிகளுடன் முதலிடத்தில் உள்ளது. இங்கிலாந்து (113), ஆஸ்திரேலியா (112) அணிகள் அடுத்த இரு இடங்களில் உள்ளன. இலங்கை தொடரை 3–0 என வென்ற இந்திய அணி 110 புள்ளிகளுடம் நான்காவதாக உள்ளது. 

அடுத்து நியூசிலாந்து தொடரை 3–0 என முழுமையாக வெல்லும் பட்சத்தில் இந்தியாவுக்கு 4 புள்ளி கூடுதலாக கிடைக்கும். இந்தியாவுடன் தோற்றதால் நியூசிலாந்து அணியும் புள்ளிகளை இழக்கும். இதனால் இந்தியா 114 புள்ளி பெற்று உலகின் ‘நம்பர்–1’ அணியாக உயரலாம். இங்கிலாந்து (113), ஆஸ்திரேலியாவை (112) அடுத்து நியூசிலாந்து அணி 110 புள்ளியுடன் நான்காவது இடத்துக்கு தள்ளப்படும்.